某個中午，因為汽車需要入廠維修，他們告訴我飯後即可以修理妥當，惟有在維修中心附近找間餐館吃東西。

　　最近心情不太好，工作上的壓力令自己身心疲累，累得不想跟任何人打招呼，於是找一個角落坐下，胡亂點了個飯。心情最差的時候，旁邊坐了一家五口，從他們的談話內容，我知道是父母帶著剛上中一的兒子和正在蜜運中的大女兒，還有即將成為成龍快婿的女兒男朋友，從他們幾段對話中，我的心情竟然從最低潮回升到相當開朗。

　　父親首先向中一的兒子發炮：「做人一定要勤力，好似一隻工蟻咁，唔停咁工作，唔偷懶，不問收穫，咁先至咁！知道嘛？」兒子沒好氣回父親一句：「但係最後隻勤力工蟻比入一腳踩死喎！」

　　大女兒向未來丈夫撒嬌：「結婚之後，我們有福同享，有難同當，你有咩煩惱，一定要同我分享呀！」男朋友被感動，真誠回應：「但我冇咩煩惱！」未來外父回敬一句：「咁係因為你仲未娶我個女！」身為妻子的忍不住口，笑罵丈夫：「唔好亂講說話，呢排你一定係做工做得辛苦，有冇聽我講，帶住我們屋企張全家福返公司，一有唔開心就望望張相呀？」丈夫答：「有！」妻子問「有用嗎？」丈夫答：「好有用，每次我一睇張全家福，就同自己講，有咩慘得過我而家咁丫？公司的唔開心，濕濕碎喇！然之後我又會好俾心機做事！」

　　我坐在那小角落，一邊吃焗豬排飯一邊聽棟篤笑，差點忘記去維修中心取回汽車，因為焗豬排飯很有水準，棟篤笑更加令人噴飯，雙料娛樂，樂而忘返！